‘అర్థమయ్యేట్లు చెప్పాలంటే అసలు దేవుడు లేడు. ఈ విశ్వాన్ని ఎవరూ సృష్టించ లేదు. నేను ప్రగాఢంగా విశ్వసించేదేమంటే, స్వర్గ నరకాలు లేవు. మరణానంతర జీవితం కూడా లేదు. అద్భుతమైన ఈ విశ్వ రహస్యాల్ని తెలుసుకోవాలంటే మనకు ఉన్నది ఒక్క జీవితం మాత్రమే’ అని అంత బలంగా చెప్పిన డాక్టర్ స్టీఫెన్ హాకింగ్‌కు ఆ ఒక్క జీవితం కూడా ఎంతో దారుణంగా గడపాల్సి వచ్చిందని చాలా మందికి తెలిసి ఉండకపోవచ్చు. ‘నా శరీరం నిస్సత్తువగా కుర్చీలో కూలబడి పోవచ్చు. కానీ, నా మెదడు విశ్వాంతరాళాల్ని శోధిస్తుంది అని ఎంతో ఆత్మ విశ్వాసంతో చెప్పుకున్న భౌతిక శాస్త్రవేత్త హాకింగ్.
విద్యార్థి దశ నుంచే అభ్యుదయ భావాలు..
1942 జనవరి 8న ఇంగ్లండులోని ఆక్స్‌ఫర్డ్‌లో జన్మించిన హాకింగ్ ముప్ఫయ్యేళ్లు కేంబ్రిడ్జి విశ్వవిద్యాలయంలో ప్రొఫెసర్‌గా పని చేసి, పదవీ విరమణ చేశారు. హాకింగ్ తల్లి బ్రిటీష్‌ కమ్యూనిస్ట్‌ పార్టీ సభ్యురాలు. అందువల్ల స్టీఫెన్‌కు చిన్నప్పటి నుంచిప్రగతిశీల భావాలు అబ్బాయి. తండ్రి ఫ్రాంక్‌ మెడికల్‌ డాక్టరు, పరిశోధకుడు. విద్యార్థి దశలో పరిచయమైన జేన్‌ వైల్డ్‌తో పరిచయం ప్రేమగా మారి పెళ్లి చేసుకున్నాడు. అప్పటికే అతనికి మోటార్‌ న్యూరోసిస్‌ వ్యాధి సోకింది. ఫైనల్‌ ఇయర్‌లో ఉండగా స్టీఫెన్‌లో ఎఎల్‌ఎస్‌ వ్యాధి లక్షణాలు కనిపించాయి. ఇది ఒక మోటార్‌ న్యూరాన్‌ వ్యాధి. ఈ వ్యాధి బయట పడినప్పుడు ఆయన కేవలం రెండు సంవత్సరాలు మాత్రమే బతకగలడని డాక్టర్లు చెప్పారు. అంటే ఆయన తన 23వ యేట చనిపోవాల్సింది. కానీ ఆయన తన 76వ యేట, 14. 3. 2018 న మరణించాడు.
శాస్త్రవేత్తగా కాదు.. మామూలు వ్యక్తిగా భావించమనేది..
బ్లాక్‌ హోల్స్‌పై పరిశీలనలు చేస్తున్న సమయంలోనే 1965లో గాన్‌విల్లి కైస్‌ కాలేజివారి ఫెలోషిప్‌ దొరికింది. దాంతో అప్లయిడ్‌ మాథమెటిక్స్‌, థియరటికల్‌ ఫిజిక్స్‌-కాస్మోలజీలో పిహెచ్‌డి తీసుకున్న స్టీఫెన్, మొదట్లో క్లచస్‌ ఉపయోగిస్తూ మెల్లగా నడిచేవారు. హాకింగ్ తన శారీరక లోపాల గురించి ఎవరితోనూ ఎక్కువగా చర్చించేవారు కాదు. విధి రాత, దైవం వంటి వాటిని నమ్మేవారు కాదు. కాబట్టి వాస్తవ స్థితి ఎదుర్కోవడానికి సిద్ధపడేవారు. తన వైకల్యానికి సానుభూతి ప్రకటిస్తూ సహాయపడడానికి వచ్చే వారిని వారించేవారు. ఆయన తనను మొదట సైంటిస్ట్‌గా గుర్తించాలనుకునే వారు. తర్వాత పాపులర్‌ సైన్స్‌ రచయితగా, కొన్ని ఆలోచనలతో, భావాలతో, ఆశలతో, కోర్కెలతో ఉన్న ఒక మామూలు మనిషిగా గుర్తించాలని కోరుకునే వారు. ‘ఆయనది గొప్ప ధ్యేయమని’ కొందరంటే-‘పిచ్చి పట్టుదల’ అని మరి కొందరనే వారు.
ఆకాశాన్నే కొంచెం పైకి ఎదగాలని సవాల్ విసిరాడు..
స్టీఫెన్ హాకింగ్ కేవలం మనిషి ఆత్మ విశ్వాసాన్ని నమ్మిన శాస్త్రవేత్త. మేధావి. ఆయనను కాపాడుకోవడానికి కుటుంబమే కాదు సమాజమే కదిలి వచ్చింది. మనిషి కోసం మనుషులు కదిలి వచ్చి నట్టయ్యింది. అంతటి దయనీయ స్థితిలో కూడా ఆయన దేవుణ్ణి తలవలేదు. ముడుపులు కట్టలేదు. పైగా ‘వైజ్ఞానిక శాస్త్ర పరిశోధనల్లో దేవుడి ప్రమేయమే లేదని అన్నారు. మనిషి చేస్తున్న ఆవిష్కరణలు, సాధిస్తున్న విజయాలు-లేని దేవుడి-ఖాతాలో వేస్తూ బతికే పలాయన వాదులున్నంత కాలం మార్పు రాదు. ఈ విషయం చెప్పడానికే స్టీఫెన్ హాకింగ్ శారీరక బలహీనత గూర్చి, ఆయన అచంచల ఆత్మ విశ్వాసం గూర్చి ఇక్కడ చెప్పాల్సి వచ్చింది. మృత్యువు అంచుమీద శ్వాసిస్తూ కూడా, మనిషి విజయ పరంపర గూర్చి మాత్రమే ఆలోచించారు డాక్టర్ స్టీఫెన్ హాకింగ్. ఒక రకంగా చెప్పాలంటే ఆరోగ్యంగా కనిపిస్తున్న దుర్భలులైన కోట్లాది జనం కంటే హాకింగ్ దృఢ సంకల్పుడు. మానసిక బలశాలి. ఆయన ఆకాశమే హద్దు అనుకోలేదు. ఆ ఆకాశాన్ని ఇంకొంచెం పైకి ఎదగమని విసరకనే సవాల్ విసిరిన నవయుగ వైతాళికుడు.
స్టీఫెన్ హాకింగ్ 80 జయంతి సందర్భంగా నివాళులతో
సేకరణ : ఆర్కే చిన్నం గారి ఎఫ్బీ వాల్ నుంచి
