జిల్లాల విభజన ఆంధ్రప్రదేశ్ లో వివాదాలకు కారణమవుతోంది. దాదాపుగా అన్ని ప్రాంతాల్లోనూ ఏదో ఒక ఆందోళన జరుగుతోంది. జిల్లా పేరు మార్చాలని కొన్ని చోట్ల, జిల్లా కేంద్రంగా తమ ప్రాంతమే ఉండాలని మరికొన్నిచోట్ల నిరసనలు వెల్లువెత్తుతున్నాయి. రెవెన్యూ డివిజన్ల కోసం ఉద్యమాలు సాగుతున్నాయి. తమ ప్రాంతాన్ని ఆ జిల్లాలో కలపొద్దు… ఈ జిల్లాలో కలపాలనే డిమాండ్లు వినిపిస్తున్నాయి. ఇక గోదావరి జిల్లాల్లో విభజన మంటలు రేకెత్తిస్తోంది.
భీమవరం జిల్లా కేంద్రంగా కొత్తగా ఏర్పాటు కానున్న జిల్లాపై కాపు సంక్షేమ సేన అధ్యక్షుడు హరిరామజోగయ్య సంచలన ప్రకటన చేశారు. కొత్తజిల్లాల ఏర్పాటులో భీమవరం వైసీపీ నేతలు, ప్రజలు విజయం సాధించారని అన్నారు. నరసాపురం వైసీపీ నేతలు, ప్రజలు ఓడిపోయారని చెప్పారు. ఈ ఒక్క నిర్ణయం చాలు ప్రభుత్వం ఏ ప్రాంతాన్ని, ఏ కులాన్ని వెనకేసుకొస్తుందో తెలియడానికి అని హరిరామజోగయ్య ఆస‌క్తిక‌ర వ్యాఖ్య‌లు చేశారు.
పశ్చిమ గోదావరి జిల్లాను ఏలూరు కేంద్రంగా ఏలూరు జిల్లా, భీమవరం కేంద్రంగా పశ్చిమ గోదావరి జిల్లాను ఏర్పాటు చేస్తూ ప్రభుత్వం నోటిఫికేషన్‌ను జారీ చేసింది. ఏలూరు జిల్లాలో ఏలూరు, దెందులూరు, పోలవరం, చింతలపూడి, ఉంగుటూరు పాత నియోజకవర్గాలతో పాటు కొత్తగా కృష్ణా జిల్లా పరిధిలోని నూజివీడు, కైకలూరును ఇందులో విలీనం చేయనున్నారు. దాదాపు ఏడు అసెంబ్లీ నియోజక వర్గాలను ఒకటిగా చేసి కొత్త జిల్లాకు రూపకల్పన చేశారు.
భీమవరం జిల్లాలో నరసాపురం పార్లమెంట్ పరిధిలోని ఏడు అసెంబ్లీ నియోజకవర్గాలను చేరుస్తూ ఉత్తర్వులు ఇచ్చారు. నరసాపురం, ఉండి, భీమవరం, పాలకొల్లు, ఆచంట, తణుకు, తాడేపల్లిగూడెం అసెంబ్లీ నియోజక వర్గాలుంటాయి. రాజకీయంగా, రైతుల పరంగా, మార్కెట్ పరంగా.. భీమవరం జిల్లా ప్రాంతమంతా బాగా అభివృద్ధి చెందింది. తాడేపల్లిగూడెం విద్యా, వాణిజ్య రంగాల్లో దూసుకు పోతుండగా.. భీమవరం ఆంధ్రా లాస్‌వెగాస్‌గా, ఆక్వా సెంట‌ర్‌గా పేరు గాంచింది. ఇలా డెవ‌ల‌ప్ అయిన ప్రాంతమంతా ఒక జిల్లాగా మారిస్తే.. మిగ‌తా వెన‌క‌బ‌డిన ప్రాంతాలు మ‌రింత వెన‌క‌బ‌డ‌తాయ‌ని వాపోతున్నారు.
భీమవరం కేంద్రంగా జిల్లా ఏర్పాటు రాజకీయ కుట్రేనని.. నరసాపురాన్నే జిల్లా కేంద్రంగా ఉంచాల‌ని డిమాండ్లు వెల్లువెత్తుతున్నాయి. ప్రసిద్ధ పుణ్యక్షేత్రం ద్వారకా తిరుమల.. ఇప్పుడు ప్రతిపాదిత రాజమహేంద్రవరం జిల్లాలో చేరింది. వాస్తవానికి ద్వారకా తిరుమల ఏలూరుకు 40 కిలోమీటర్ల సమీపాన ఉండగా, రాజమహేంద్రవరానికి 75 కిలోమీటర్ల దూరాన ఉంది. ఏలూరు జిల్లాలో చేరనున్న కృష్ణా జిల్లా ఆగిరిపల్లి విజయవాడకు చేరువలో ఉంటుంది. నూజివీడు నియోజకవర్గాన్ని ఏలూరు జిల్లాలో విలీనం చేయడం వల్ల దాదాపు 60 కిలోమీటర్లు ప్రయాణ భారం పెరుగుతుందని ఆవేదన వ్యక్తం చేస్తున్నారు.
