హైదరాబాద్ .. ఈపేరు వినగానే ఆహార ప్రియులకు ముందుగా గుర్తుకొచ్చేది బిర్యానీ.. హాలిమ్. వీటితోపాటు తియతియ్యగా.. ఉప్పుప్పంగా నోట్లో కరిగిపోయే ఉస్మానియా బిస్కెట్లు. వీటి రుచి గురించి తెలియని వారు ఉండరు.
ఇరానీ చాయ్ తాగుతూ ఉస్మానియా బిస్కెట్ తినకపోతే అదేం సాయంత్రం అని పెదవి విరిచేవారూ ఉన్నారు. ఇంతకీ ఉస్మానియా బిస్కెట్ కి ఆ పేరు ఎలా వచ్చిందో , ప్రత్యేకంగా దానిని ఎక్కడ తయారు చేస్తారో చాలామందికి తెలియదు.
ఉస్మానియా బిస్కెట్ ప్రత్యేకించి ఫలానా బేకరీ లోనే చేస్తారని లేదు. హైదరాబాద్ నిజాం ఉస్మాన్ అలీ ఖాన్ పేరుతోనే వీటికి ఉస్మానియా బిస్కెట్లనే పేరొచ్చిందట. 70 ఏళ్ల క్రితం అబిడ్స్ దగ్గర ఓ పార్సీ బేకరిలో మాత్రమే ఇవి దొరికేవంటారు.
నిజాం ఓ సారి వాటిని అల్పాహారం లో రుచి చూశారు. ఆ రుచికి ముగ్దు డైన నిజాం తను ఇష్టంగా తినడంతో పాటు తన దగ్గరకు వచ్చే అతిథులకు కూడా వీటిని అందించేవారట.
అలా మొదలైన ఈ నవాబీ వంటకం ప్రస్తుతం నగరంలో ప్రతి చోట దొరుకుతుంది. ఈ బిస్కెట్లను రోగులకు పోషకాహారం లో ఇస్తే చాలా ఉపయోగకరం అని ఆహార నిపుణులు కూడా పేర్కొన్నారు. మరెందుకు ఆలస్యం !
