ఏపీలోనూ ఆప్​ పాగా​… అసమ్మతి నేతలపై గురి !

ఆమ్​ ఆద్మీ పార్టీ దేశ రాజధాని ఢిల్లీలో వరుసగా మూడు సార్లు అధికారాన్ని కైవసం చేసుకుంది. మొన్నటి పంజాబ్​ ఎన్నికల్లో బీజేపీ, కాంగ్రెస్​ను వెనక్కి కొట్టేసింది. అంతటితో ఆప్​ జైత్ర యాత్ర ఆగలేదు. పొరుగునున్న తెలంగాణలో పాగా వేసింది. అక్కడ టీజేఎస్​తో మంతనాలు జరుపుతోంది. ఇక ఏపీలో అయితే వైసీపీ, టీడీపీ అసంతృప్తి నేతలపై గురి పెట్టింది. కులమతాలకు అతీతంగా వ్యవహరించే ఆప్​ ఏమేరకు సఫలీకృతమవుతుందో మరి.

ఆమ్​ఆద్మీ పార్టీ విధానాలు నేడు దేశ వ్యాప్తంగా చర్చనీయాంశమయ్యాయి. దేశంలోకెల్లా అప్పులు లేని రాష్ర్టంగా ఢిల్లీని అద్భుతంగా తీర్చి దిద్దిన ఘనత ఆప్​ దే. విద్యా, వైద్య రంగాల్లో ఆప్​ తీసుకొచ్చిన పెనుమార్పులు అన్ని రాష్ట్రాలను ఆలోచనలో పడేశాయి. సగటు పౌరుడి జీవన వ్యయంలో సింహభాగం వహిస్తున్న విద్య, వైద్యాన్ని ప్రజలకు ఉచితంగా అందించడం ద్వారా వారి కొనుగోలు శక్తి పెరుగుతుంది. అనివార్యంగా అది ఆర్థిక వ్యవస్థ మెరుగుదలకు దోహదపడుతుంది. ఢిల్లీలో ఆప్​ సక్సెస్​ ఫార్ములా ఇందులోనే ఉంది.

పొరుగునున్న తెలంగాణలో టీజేఎస్​తో ఆప్​ నేతలు మంతనాలు జరిపారు. ఇక్కడ సీపీఐ నేత సుధాకర్​ ఆప్​లో చేరారు. టీజేఎస్​ కూడా కలిసొస్తే వచ్చే ఎన్నికల నాటికి ఆమ్​ ఆద్మీ పార్టీ కీలక శక్తిగా మారుతుంది. సంప్రదాయ పార్టీల అవినీతి.. బంధుప్రీతి, కుటుంబాల పాలనతో జనం విసిగెత్తి పోయారు. అటు బీజేపీ మత విద్వేషాలను రెచ్చగొట్టి అధికారానికి రావాలని ఉవ్విళ్లూరుతోంది. బీజేపీ, ప్రాంతీయ పార్టీలకు జాతీయ స్థాయిలో ప్రత్యామ్నాయంగా ఆప్​ కనిపిస్తోంది.

ప్రస్తుతం ఏపీలో ఆమ్​ ఆద్మీ పార్టీకి చెప్పుకోదగ్గ నాయకుల్లేరు. గత కొంత కాలంగా ఆప్​ చేస్తున్న ప్రయత్నాలతో ఇక్కడ నుంచి కొందరు రైతు సంఘ నేతలు, మాజీ ఎంపీ, ఎమ్మెల్యేలు ఆప్​తో టచ్​లో ఉన్నారు. కేవలం కొద్ది మంది మాజీ నేతలతో ఎంట్రీ ఇవ్వడానికి ఆప్​ నాయకత్వం ఇష్ట పడలేదు. దీంతో వైసీపీ, టీడీపీలో తటస్థ వైఖరి కలిగిన నేతలపై గురి పెట్టింది. ఈ రెండు పార్టీల పోకడలతో విసుగెత్తిన నాయకులు ఆప్​ తెలుగు రాష్ట్రాల సమన్వయ బాధ్యతలు నిర్వహిస్తున్న బాదర్ల కృష్ణ ప్రసాద్​ను సంప్రదిస్తున్నారు.

‘ఢిల్లీలో తొలిసారి విజయపతాకం ఎగరేసిన వెంటనే తెలుగు రాష్ట్రాల్లోనూ ఆప్​ నేతలు పర్యటించారు. ఇక్కడ పార్టీ బలోపేతానికి కొన్ని ప్రయత్నాలు జరిగాయి. ప్రతీ జిల్లాలో ఆప్​ కార్యకర్తలు ఏర్పాటయ్యారు. ఇప్పుడు వివిధ ప్రజా సంఘాల్లో.. ఉద్యమాల్లో పనిచేసిన నేతలు వస్తున్నారు. వారితోపాటు వైసీపీ, టీడీపీ నుంచి రాజకీయంగా ఆప్​ విధానాలు నచ్చి వస్తున్న వాళ్లు సంప్రదిస్తున్నారు. ఎవరెవరనేది త్వరలో వెల్లడిస్తాం!’ అని కృష్ణ ప్రసాద్​ పేర్కొన్నారు.