కేంద్రం దగా చేస్తుంటే మీరేం చేస్తున్నారు ?

పన్నుల వాటాలో రాష్ట్రాలకు కేంద్రం 41 ఇవ్వాల్సి ఉంటే కేవలం 32.36 శాతమే ఇస్తోందని వైసీపీ ఎంపీ విజయసాయిరెడ్డి వెల్లడించారు. దీని వల్ల సుమారు రూ. 50 వేల కోట్లు నష్టపోతుంటే నిలదీయకపోవడం.. నిరసించకపోవడం.. రాష్ట్ర ప్రజలను వంచించడం కాదా ! కేంద్రం పన్నులు పెంచితే వాటాలు ఇవ్వాల్సి వస్తుందని సెస్​లు, సర్​చార్జీలు మాత్రమే పెంచుతుంటే మీరు ఏ గుడ్డి గుర్రం పళ్లు తోముతున్నారు మహాశయా ! ప్రతీ అంశంలో కేంద్రం అడక్క ముందే జీ హుజూర్​ అంటూ సాగిలపడుతూ రాష్ట్ర ప్రజలకు ఏం సందేశం ఇవ్వదల్చుకున్నారో చెబుతారా !

నిన్న ఢిల్లీలో వైసీపీ ఎంపీ విజయసాయిరెడ్డి అప్పులకు సంబంధించి మీడియా కాకిలెక్కలు వేస్తోందని మండిపడ్డారు. కేంద్రం కన్నా ఏపీ అప్పులే తక్కువని చెప్పుకొచ్చారు. రాష్ట్రాలు చేసే అప్పులకు పరిధులు, ఆంక్షలుంటాయి. కేంద్రానికి అలాంటివి లేవు కాబట్టి ఇష్టారీతిన అప్పులు చేస్తోంది. అయినా కేంద్రంతో పోలికేంటీ !

కేంద్ర, రాష్ట్ర స్థూల ఉత్పత్తిలో అప్పుల శాతమెంతనేది పోల్చుకుంటారు. దీని లెక్క ప్రకారం 32.4 శాతంతో మిగతా రాష్ట్రాలతో పోల్చుకుంటే ఐదో స్థానంలో ఉన్నట్లు విజయసాయిరెడ్డి పేర్కొన్నారు. చంద్రబాబు హయాంలో 117.42 శాతం అప్పులు చేస్తే తమ ప్రభుత్వ హయాంలో 43 శాతం మాత్రమే పెరిగాయని ఆయన వివరించారు

రాష్ట్ర అప్పుల గురించి ఇతర రాష్ట్రాలతో పోల్చడం సరికాదు. ఆయా రాష్ట్రాల ఆదాయం, స్థూల ఉత్పత్తిని బట్టి వాళ్లు అప్పులు చేస్తుంటారు. ఏపీ అప్పుల గురించి కేంద్రం తక్కువ చేసి చూపించడమేంటని ఏపీ ప్రొఫెషనల్​ ఫోరం ఆక్షేపిస్తోంది. ఫోరం అధ్యక్షుడు నేతి మహేశ్వరరావు మీడియాతో మాట్లాడుతూ ఏపీ ప్రత్యక్ష అప్పులు రూ.3,98,903 కోట్లుగా కేంద్ర ఆర్థిక మంత్రి నిర్మలా సీతారామన్​ ప్రకటించడం రాష్ట్ర ప్రజలను తప్పుదోవ పట్టించడమేనని తిప్పికొట్టారు.

కార్పొరేషన్ల ద్వారా తీసుకున్నవి, ప్రభుత్వం చెల్లించాల్సిన పెండింగ్​ బిల్లులతో కలపుకుంటే రాష్ట్ర అప్పులు రూ.8,34,599 కోట్లు అవుతుందని మహేశ్వరరావు వెల్లడించారు. 2019–20లో జీఎస్​డీపీ 16 శాతం ఉంటే 2020–21లో ఒక శాతానికి పడిపోయింది. రాష్ట్ర సర్కారు తెచ్చిన అప్పుల్లో ఆస్తులు, ఆదాయాన్ని సమకూర్చేందుకు ఎంత కేటాయించారో తెలియజేస్తూ శ్వేత పత్రం విడుదల చేయాలని రాష్ట్ర ప్రభుత్వాన్ని మహేశ్వరరావు డిమాండ్​ చేశారు. ఇంతకీ ప్రభుత్వం స్పందించి ప్రజల అనుమానాలను నివృత్తి చేస్తుందా !