సమాజపు కట్టుబాట్లను, కుల వివక్షను ప్రశ్నిస్తూ మానవత్వపు విలువలను చాటిచెప్పే అద్భుతమైన కథాంశం ఇది. ఊరిలో ఎంతో గౌరవప్రదమైన జీవితం గడిపే లక్ష్మీపతి, ఒక నిమ్న కులానికి చెందిన అనాథ పసికందును చేరదీస్తాడు. ఆ నెపంతో కన్నవారు, కట్టుకున్నవారు, ఊరివారంతా అతడిని వెలివేస్తారు. మానవత్వమే మతంగా భావించిన ఆ ఆదర్శమూర్తి, తన ఆస్తులను వదులుకుని ఊరు విడిచి పట్నం చేరతాడు. ఆ అనాథ బిడ్డ శాంతి, లక్ష్మీపతి సొంత కూతురు గీతతో పాటే సమానంగా పెరుగుతుంది. కాలక్రమంలో శ్రీనివాస్ అనే యువకుడు శాంతికి చేరువవుతాడు. కులమతాల ఉక్కుపాదాల కింద నలిగిపోతున్న మనిషి, స్వచ్ఛమైన ప్రేమ ద్వారా, మహోన్నతమైన సంస్కారం ద్వారా ఎలా విజయం సాధించాడన్నది ఈ చిత్ర అంతరంగం.