ఏంటి అలా చూస్తున్నారు? ప్రతిసారీ 'తెలుగిల్లు' వాకిట్లో కూర్చుని హీరో హీరోయిన్లు పాడుకునే రొమాంటిక్ పాట గురించో, లేక ఒక అందమైన ఫ్యామిలీ సీన్ గురించో విశ్లేషణ ఇస్తాననుకున్నారా? లేదు... ఈసారి వాతావరణం కొంచెం డార్క్ గా ఉండబోతోంది. కథని రసవత్తరంగా మార్చాలంటే ముందు విలన్ రంగంలోకి దిగాలి కదా! వెల్కమ్ టు 'విలన్స్ అడ్డా' (Villain's Adda).
హీరోల గురించి అందరూ మాట్లాడుకుంటారు. కానీ ఒక హీరోను హీరోలా నిలబెట్టేది ప్రతినాయకుడే! ఈరోజు మనం మాట్లాడుకోబోయే విలన్... తెలుగు సినిమా హిస్టరీలోనే ఒక స్పెషల్ పీస్. రామ్ గోపాల్ వర్మ సృష్టించిన 'క్షణక్షణం' సినిమాలో ఆ నెగటివ్ ఫోర్స్... గ్యాంగ్ స్టర్ 'నాయర్'. పరేష్ రావల్ గారు ప్రాణం పోసిన అద్భుతమైన క్యారెక్టర్ అది.
మామూలుగా విలన్లు అంటే ఎలా ఉంటారు? కత్తులు పట్టుకుని అరుస్తారు, కళ్ళు ఉరుముతారు, పది మందిని వెంటేసుకుని తొడలు కొడతారు. కానీ ఈ నాయర్ అలా కాదు. చాలా కూల్... డెడ్లీ కూల్! ఒక పక్కన తన మనుషులముందే పియానో వాయిస్తూ అర్థంకాని పాట పాడుతూ ఉంటాడు... ఇంకో పక్కన ఎటువంటి ఎమోషన్ లేకుండా ఒక మనిషిని చంపేయమని ఆర్డర్ ఇస్తాడు. ఒక మర్డర్ ని కూడా ఒక రోజువారీ పనిలా ఎంత క్యాజువల్ గా డీల్ చేస్తాడో చూస్తే మనకు వెన్నులో వణుకు పుడుతుంది.
పరేష్ రావల్ గారి ఆ విచిత్రమైన తెలుగు డబ్బింగ్, ఆ డెడ్ పాన్ (Deadpan) మాడ్యులేషన్ ఇందులోని విలనిజానికి ఒక డార్క్ కామెడీని యాడ్ చేశాయి. ఎప్పుడైతే విలన్ తన పని తాను చేసుకుంటూ, ఎదుటివాడి ప్రాణాన్ని ఒక పురుగుకన్నా హీనంగా చూస్తాడో... అప్పుడే స్క్రీన్ మీద నిజమైన భయం పుడుతుంది.
విలన్ అంటే గట్టిగా అరవాల్సిన అవసరం లేదు, ఒక చూపు, కూల్ ఎక్స్ప్రెషన్ చాలు అని నిరూపించిన క్యారెక్టర్ ఇది. అందుకే 'క్షణక్షణం'లో శ్రీదేవి, వెంకటేష్ ల ఛేజ్ ఎంత త్రిల్లింగ్ గా ఉంటుందో... వాళ్ళను వెంబడించే ఈ నాయర్ సైకాలజీ కూడా అంతే కిక్ ఇస్తుంది.