ట్రాఫిక్ జామ్ కాదు... మైండ్ జామ్!

ఏంట్రా... వరుణ్ ఇంకా రాలేదు?

ఈ పాటికి వచ్చేయాలి.

వరుణ్ బావ లేటయ్యాడంటే రెండే కారణాలు—ఒకటి కోర్టు, రెండోది ట్రాఫిక్!

హలో వరుణ్, ఎక్కడున్నావ్?

మాదాపూర్ సిగ్నల్ దాటుతున్నా... ఐదు నిమిషాలు!

అంటే ఇంకో అరగంట అన్నమాట!

హమ్మయ్య! ఈరోజు హైదరాబాద్ ట్రాఫిక్ నా మీద దయ చూపింది.

ఏమైంది బావా, రోజూ జరిగే రణరంగమేనా?

అంతకంటే ఎక్కువే! మొదట ఒక 'ఎదురుదారి వీరుడు' తగిలాడు. వన్‌వేలో దర్జాగా ఎదురుగా వస్తూ, నన్నే సైడ్ ఇవ్వమన్నాడు. తప్పు చేస్తున్నాననే బెరుకు ఉండదు, పైగా మనల్ని అడ్జస్ట్ అవ్వమనే కాన్ఫిడెన్స్!

అదే విచిత్రం. తప్పుని కూడా హక్కులా ఫీలవుతారు.

ఆ తర్వాత 'రాకెట్ రాజు'. సిగ్నల్ గ్రీన్ అవ్వకముందే హారన్ల మోత. తీరా రాకెట్‌లా దూసుకెళ్లి... రెండు వందల మీటర్ల తర్వాత తర్వాతి సిగ్నల్ దగ్గర నా పక్కనే వచ్చి ఆగాడు! వేగంగా వెళ్లాడా, లేక శబ్దం చేస్తూ వెళ్లాడా అనిపించింది.

నాకు ఈ 'హార్న్ హరికృష్ణలు' రోజూ కనిపిస్తారు బావా. సిగ్నల్ రెడ్‌లో ఉన్నప్పుడు హారన్ కొడితే... ముందున్న కార్లు మాయమైపోతాయని వాళ్ల నమ్మకమేమో!

ఇంకొందరుంటారు—'ఇండికేటర్ అనేది కారుకి డెకరేషన్ పీస్' అనుకునేవాళ్లు! ఎటు తిరుగుతారో వెనకున్నవాళ్లు జ్యోతిష్యం చెప్పాలి.

అద్భుతమైన మాట! ట్రాఫిక్ అంటే వాహనాల రద్దీ మాత్రమే కాదు. ఒకడు రాంగ్ రూట్ వచ్చినా, హఠాత్తుగా కారు ఆపినా... ఆ ఒక్కడి నిర్ణయానికి వంద మంది బలి.

నిజమే! ఒకడు రెండు నిమిషాలు ఆదా చేసుకోవాలనే స్వార్థంతో... వెనకున్న ఇరవై మందికి ఇరవై నిమిషాల నష్టం. ఇది టైమ్ మేనేజ్‌మెంట్ కాదు, 'టైమ్ రాబరీ'!

అందుకే ప్రపంచం ఇప్పుడు ట్రాఫిక్‌ని రోడ్ల సమస్యగా కాకుండా, 'డేటా సమస్య'గా చూస్తోంది.

అంటే?

ఉదాహరణకు—AI సిగ్నల్స్. ఇవి ఫిక్స్‌డ్ టైమర్లతో పనిచేయవు. కెమెరాల ద్వారా ఏ రూట్లో ఎంత రద్దీ ఉందో లెక్కవేసి, ప్రతి నిమిషం పరిస్థితులకు తగ్గట్టు సిగ్నల్ మారుస్తాయి.

సిగ్నల్స్ కూడా ఆలోచిస్తున్నాయన్నమాట!

అంతే కాదు, Vehicle-to-Vehicle (V2V) Communication. కార్లు తమలో తాము మాట్లాడుకుంటాయి. "నేను సడన్ బ్రేక్ వేస్తున్నా, నువ్వు స్లో అవ్వు" అని మనుషుల కంటే వేగంగా సమాచారం పంచుకుంటాయి.

అలాగే సినిమాల్లోలాగా ఫ్లయింగ్ కార్లు కూడా వచ్చేస్తే పోలా?

అవి ఇప్పటికే వచ్చేశాయి సూర్యా! ఏదో ఒక్క కంపెనీ అనుకుంటే పొరపాటే, ప్రపంచవ్యాప్తంగా పెద్ద రెస్సే నడుస్తోంది.

అవునా? ఎక్కడెక్కడ?

స్లోవాకియాలో Klein Vision వాళ్ల 'AirCar', అమెరికాలో Alef Aeronautics 'Model A', ఇక చైనాలో XPENG వాళ్ల 'ల్యాండ్ ఎయిర్‌క్రాఫ్ట్ క్యారియర్'... ఇలా చెప్పుకుంటూ పోతే AeroMobil తో పాటు వందలాది సంస్థలు రోడ్డు మీద నడిచే, గాల్లో ఎగిరే eVTOL ప్రోటోటైప్స్‌పై తీవ్రంగా పరిశోధనలు చేస్తున్నాయి.

అంటే ఇవన్నీ నిజంగానే మన ముందుకు వస్తాయంటావా?

ప్రస్తుతానికి అభివృద్ధి దశలోనే ఉన్నా... నిపుణుల అంచనా ప్రకారం మరో పది, పదిహేనేళ్లలో వీటిలో కొన్ని మన రోడ్ల మీద, ఆకాశంలో కూడా చక్కర్లు కొట్టడం ఖాయం!

టెక్నాలజీ బానే ఉంది... కానీ మన 'ఎదురుదారి వీరుడు' ఆకాశంలో కూడా రాంగ్ రూట్లో ఎదురుగా వస్తే?

అప్పుడు పైనున్న ఎయిర్ ట్రాఫిక్ కంట్రోల్ వాళ్లకు కూడా హెల్మెట్లు తప్పవు!

అదే అసలైన కామెడీ! మనం వాహనాలకు రెక్కలు తొడగాలని చూస్తున్నాం... కానీ మన బుర్రలకి ఉన్న తుప్పు వదిలించడం మర్చిపోతున్నాం.

తుప్పు అంటే?

అదేరా... "నాది ఒక్కడిదే కదా తొందర" అనే స్వార్థం! స్మార్ట్ సిటీలు, స్మార్ట్ సిగ్నల్స్, ఫ్లయింగ్ కార్లు వస్తే ట్రాఫిక్ తగ్గిపోదు... 'స్మార్ట్ సిటిజన్స్' తయారైనప్పుడే తగ్గుతుంది.

అక్షరాలా నిజం! AI సిగ్నల్‌ని కంట్రోల్ చేయగలదు, కారు వేగాన్ని నియంత్రించగలదు, ప్రమాదాన్ని ముందే పసిగట్టగలదు... కానీ "నేను ఒక్కసారి రూల్ బ్రేక్ చేస్తే నష్టం ఏంటి?" అనే ఆలోచన పోయి, బాధ్యత రావాల్సింది... ఇంగితజ్ఞానం రావాల్సింది... స్టీరింగ్ పట్టుకొని డ్రైవింగ్ సీట్లో కూర్చునే మనకే!

అందుకేనేమో... ఫోన్లకి, కార్లకి, సాఫ్ట్‌వేర్లకి రోజుకో అప్‌డేట్ వస్తోంది... కానీ మనిషి కామన్ సెన్స్‌కి మాత్రం ఇంకా 'అప్‌డేట్' విడుదల కాలేదు!